பொதுமக்களின் மருத்துவப் பிரச்சனைகள் குறித்து தொடர்ந்து சமூக வலைதளங்களில் தெளிவாக, விளக்கமாகவும் எழுதி வருபவர், பிரபல டாக்டர் அ.ப.ஃபரூக் அப்துல்லா. சிவகங்கையைச் சேர்ந்த பொதுநல மருத்துவரான இவர், பொதுநலத்தோடு சமீபத்தில் வெளியிட்ட மருத்துவத்தகவல் சமூக வலைதளங்களில் வைரல் ஆகிவருகிறது. அதாவது, தன்னிடம் மருத்துவ ஆலோசனை பெற வந்த வளரிளம் பெண்ணிற்கு படம் வரைந்து தெளிவாக, புரியும்படி கூறியது குறித்து அவர் தகவல் வெளியிட்டுள்ளார்.

அவர் கூறிய தகவல் இதுதான், “சமீபத்தில் கிளினிக்கில் வளர் இளம் பருவத்தில் உள்ள பெண்
தனக்குள்ள வெள்ளைப்படுதல் பிரச்சினைக்காக என்னை சந்தித்தார்.

வெள்ளைப்படுதல் என்பது பருவ வயதை எட்டிய பெண்களில், பொதுவாக நார்மலான விசயமாக பார்க்கப்படுகிறது.

ஈஸ்ட்ரோஜென், ப்ரோஜெஸ்டிரோன் போன்ற ஹார்மோன்களின் விளையாட்டால் மாதவிடாய் நிகழ்வுக்கு முன்பு வெள்ளைப்படுதல் இருக்கலாம்.

ஆயினும் வெள்ளைப்படுதல் பல மாதங்களாக தொடர்ந்து இருந்தாலோ
அல்லது தயிர் போன்று கெட்டிப்பட்டு வெள்ளைப்படுதல் இருந்தால், கேண்டிடா பூஞ்சைத் தொற்று இருப்பதற்கான அறிகுறி என குறிப்பிட்டுள்ளார்.



மேலும் அவர் கூறும்போது, “வெள்ளைப்படுதலோடு கூடவே கெட்ட வாசனை அடிக்குமானால் பாக்டீரியா தொற்று இருக்கக்கூடும். இத்தகைய சூழ்நிலையில் கட்டாயம் தகுந்த சிகிச்சை செய்து வெஜைனா எனும் யோனிப்பகுதியில் ஏற்பட்டுள்ள தொற்றை குணப்படுத்த வேண்டும்” என எச்சரித்துள்ளார்.



“இது குறித்த விழிப்புணர்வு பல வளர் இளம் பருவத்தினரிடமும் வளர்ந்த பெண்களிடமும் இல்லை.
எனவே, என்னை சந்தித்த வளர் இளம் பருவத்து மாணவியிடம் படமாக வரைந்து,
வெள்ளைப்படுதலை முறையாக கவனிக்காமல் விட்டால் கர்ப்பப்பையின் வாய் வழியாக
தொற்று, கர்ப்ப பைக்குப் பரவி நாளடைவில் நீண்ட நாள் கவனிக்காமல் விட்டால்
சினைக்குழாய் அடைப்பை ஏற்படுத்தலாம்.
தொற்று வயிற்றுப் பகுதிக்கும் பரவவும் வாய்ப்புண்டு.
இது இடுப்பெலும்புக்குள் இருக்கும் பகுதி மொத்தத்திலும் அழற்சியை ஏற்படுத்தலாம்.

பெண்களுக்கு வெள்ளைப்படுதலுடன் கூட பின் பக்க இடுப்பு வலி அதாவது White Discharge with low back ache இருப்பது தொற்று கர்ப்ப பைக்கும் இடுப்பெலும்புக்குள் இருக்கும் பகுதிக்கு PELVIC INFLAMMATORY DISEASE தொற்றுப் பரவல் நடந்திருப்பதைக் காட்டும் அறிகுறியாகவும் இருக்கலாம்” என கூறியுள்ளார்.


“இந்த நோய்க்கு முறையாக பெண்கள் நல மருத்துவரிடமோ குடும்பநல மருத்துவரிடமோ கூறி சிகிச்சை பெற வேண்டும் என்பது குறித்த விழிப்புணர்வு ஏற்படுத்தவே இந்தப் பதிவு” எனவும் குறிப்பிட்டுள்ளார்.



“அம்மாவுடன் வந்த அந்த வளர் இளம் பெண்ணுக்கு மாதவிடாய் சுழற்சி, இனப்பெருக்க உறுப்பு நலன் குறித்த சிறு பாடம், படத்துடன் எடுத்த பின் தனக்கு வந்துள்ள நோய் குறித்தும் சிகிச்சை குறித்தும் தெளிவுற விடை பெற்றுச் சென்றார். வளர் இளம் பருவத்தில் விதைக்கும் கல்வி கடைசி வரைக்கும் நிலைக்கும் என்ற திருப்தி எனக்கு... நன்றி” என குறிப்பிட்டுள்ளார்.



அந்தரங்க பிரச்சனைகளுக்கு டாக்டரிடம் கேட்காமல் பல்வேறு பிரச்சனைகளை டீனேஜ் ஆண் -பெண்கள் சந்தித்துவரும் சூழலில் இப்படி சேவை நோக்கத்தோடு அவர் அனைவருக்கும் எழுதிய தகவல், சமூக வலைதளங்களில் பரவி பாராட்டுகளையும் வரவேற்புகளையும் பெற்றுவருகிறது.