சென்னையில் தந்தை பெரியார் தி.க வின் நிகழ்ச்சியில் இந்து சமயங்களை விலைமாதுவுடன் தொடர்பு படுத்தி பொன்முடி ஆபாசமாக பேசியது, பெண்களை இழிவுபடுத்துவதாக சர்ச்சையான நிலையில் அவரது கட்சிப் பதவி பறிபோயிருக்கிறது

சென்னையில் தந்தை பெரியார் தி.க சார்பில் கடந்த ஞாயிற்றுக்கிழமை நடந்த நிகழ்ச்சி ஒன்றில் கலந்து கொண்டு அமைச்சர் பொன்முடி பேசினார், அப்போது இந்து மதத்தில் உள்ள சைவம் மற்றும் வைணவம் ஆகிய பிரிவுகளை விலை மாதுவுடன் தொடர்பு படுத்தி ஆபாசமாக பேசினார்

உண்மையில் அந்த ஆபாச பேச்சில் பெண்களுக்கு எதிரான கொச்சையான கருத்துக்கள் இருந்ததாக குற்றச்சாட்டு எழுந்தது

சமூக வலைதளங்களில் அமைச்சர் பொன்முடிக்கு எதிராக கடும் கண்டனம் எழுந்த நிலையில் திமுகவில் மகளிர் அணி செயலாளர் கனிமொழி கருணாநிதியும் தனது கண்டனத்தை பொன்முடிக்கு எதிராக பதிவு செய்திருந்தார்

அதில் எக்காரணத்தைக் கொண்டும் பெண்களுக்கு எதிரான இந்த கொச்சையான பேச்சு ஏற்க முடியாது, கண்டனத்துக்குரியது என்று கனிமொழி கூறியிருந்தார்.

இந்த நிலையில் அமைச்சர் பொன் முடியை திமுகவின் துணைப் பொதுச் செயலாளர் பொறுப்பில் இருந்து நீக்கி முதலமைச்சர் ஸ்டாலின் உத்தரவிட்டிருக்கிறார்.

வழக்கமாக திமுகவிலிருந்து ஒருவரை நீக்கும் அறிவிப்பை பொதுச்செயலாளரான துரைமுருகன் வெளியிடுவது வழக்கம் ஆனால், பொன்முடியின் ஆபாச பேச்சு விவகாரத்தில் திமுக தலைவரும், முதலமைச்சருமான மு க ஸ்டாலினே நேரடியாக நடவடிக்கை எடுத்திருப்பது குறிப்பிடத்தக்கது.

இதற்கிடையே அண்மையில் வேலூரில் நடந்த கட்சி கூட்டத்தில் தேசிய ஜனநாயக கூட்டணியை விமர்சிப்பதற்கு மாற்றுதிறனாளிகளை தொடர்புபடுத்தி கேலியாக பேசி இருந்த அமைச்சர் துரைமுருகன், தனது பேச்சுக்கு வருத்தம் தெரிவித்து அவசர அவசரமாக அறிக்கை ஒன்றை வெளியிட்டார்.