வாணியம்பாடி அருகே தனியார் மருத்துவமனையில் பயிற்சிக்காக வரும் மாணவிகளை பாலியல் சீண்டல் செய்ததாக மருத்துவமனை உரிமையாளர் மீது மாணவிகள் குற்றஞ்சாட்டிய நிலையில் காவல்துறையினர் மருத்துவரை காவல் நிலையம் அழைத்துச்சென்று விசாரித்து வருகின்றனர்

திருப்பத்தூர் மாவட்டம் வாணியம்பாடி அடுத்த புத்துகோயில் பகுதியில் நிஷா என்ற பெயரில் தனியார் மருத்துவமனை ஒன்று இயங்கி வருகின்றது. இந்த மருத்துவமனையின் உரிமையாளர் ஜாவித் என்பவர் பயிற்சிக்காக தனது மருத்துவமனைக்கு வரும் நர்சிங் மாணவிகளிடம் பாலியல் சீண்டலில் ஈடுபட்டதாக மாணவிகள் புகார் தெரிவித்தனர். தங்களுக்கு நேர்ந்த கொடுமைகளை யாரிடம் என்று சொல்வது தெரியாமல், மருத்துவமனைக்கு சென்ற ஒருவரிடம் டாக்டர் ஜாவித் செய்யும் பாலியல் அத்துமீறல்கள் குறித்து பாதிக்கப்பட்ட நர்சிங் மாணவி ஒருவர் விவரித்த ஆடியோ வெளியானது.

இந்த ஆடியோ சமூக வலைதளங்களில் வைரலான நிலையில் காவல்துறையினர் மற்றும் சுகாதாரத்துறை அதிகாரிகள் குற்றச்சாட்டு அந்த மருத்துவமனைக்கு நேரடியாக பாதிப்புக்குள்ளான மாணவிகளிடம் விசாரித்து அதனை வீடியோவாக பதிவு செய்து கொண்டனர்

அந்த மருத்துவமனையில் பயிற்சிக்காக சென்றிருந்த இரு மாணவிகள், டாக்டர் ஜாவித் தங்களிடம் அத்து மீறியதாக அதிகாரிகளிடம் தெரிவித்தனர்.

இதையடுத்து மருத்துவர் ஜாவித், அவரது மனைவி ஆகிய இருவரையும் போலீசார் விசாரணைக்காக அழைத்துச்சென்றனர். ஜாவித் இது போல எத்தனை பேரிடம் அத்துமீறலில் ஈடுபட்டார் என்பது குறித்து காவல்துறையினர் விரிவான விசாரணை நடத்தி வருகின்றனர். பயிற்சிக்கு சென்ற மாணவிகளுக்கு நிஷா மருத்துவமனையில் நிகழ்ந்ததாக கூறப்படும் அத்துமீறல் அதிர்ச்சியை ஏற்படுத்தி உள்ளது.