பஞ்சாப் - சென்னை அணிகள் மோதிய ஐ.பி.எல் போட்டியில் ஒப்பனராக களம் இறங்கிய டெவன் கான்வே 49 பந்துகளில் 69 ரன்களை எடுத்தபோது, செட் ஆகி விட்டார் இனி சிக்சர்களை பறக்க விடுவார் என ரசிகர்கள் எதிர்பார்த்தபோது திடீரென சென்னை அணி அவரை ரிட்டயர்டு அவுட் ஆகி வெளியேருமாறு கூறியது. இது பலருக்கும் ஆச்சர்யத்தையும் அதிர்ச்சியையும் ஏற்படுத்தியது.

முன்பெல்லாம் வீரருக்கு காயம் ஏற்பட்டால் விளையாட முடியாமல் ரிட்டயர்டு அவுட் ஆவார்கள். ஆனால் தற்போது மெதுவாக விளையாடுகிறார் என்ற காரணத்தால் ரிட்டயர்டு அவுட் ஆகும் கலாச்சாரம் உருவாகியுள்ளது.

அண்மையில் லக்னோவுக்கு எதிராக மும்பை அணி விளையாடியபோது மும்பை வீரர் திலக் வர்மா 23 பந்துகளில் 25 ரன்களே அடித்த நிலையில் அணியின் கோச் ஜெயவர்த்தனே அவரை ரிட்டயர்டு அவுட் ஆகுமாறு கூறினார். இதனால் அவர் பாதியிலேயே களத்தில் இருந்து வெளியேறினார்.

தற்போது கான்வேவையும் பாதியிலேயே சென்னை அணி வெளியேற்றியது அவரை அவமானப் படுத்தும் செயல் என ரசிகர்கள் இணையத்தில் கருத்து தெரிவித்து வருகின்றனர்.

சென்னை அணி வீரர் ராகுல் திரிபாதி ஓப்பனிங் பொசிசனில் கணிசமாக ரன் குவிக்கவில்லை அதனால் டெவன் கான்வே வர வேண்டும் என ரசிகர்கள் இணையத்தில் கோரிக்கை வைத்து வந்த நிலையில், இப்படி அணியே கான்வேவை ரிட்டயர்டு அவுட் ஆக்கி வெளியேற்றுவது நியாயமா? எனவும் ரசிகர்கள் தங்களது ஆதங்கத்தை கொட்டி வருகின்றனர்.

அது மட்டுமில்லாமல் போட்டிக்கு முன் விளம்பரம் ஒன்றில் பஞ்சாப் அணியின் கேப்டன் ஸ்ரேயஸ் ஐயர் சாப்பிடுவதற்கு சென்னை ஸ்பெஷல் குழம்பு வேண்டும் என கிண்டலாக கூறியிருப்பார்.

போட்டியை 18 ரன்கள் வித்தியாசத்தில் பஞ்சாப் அணி வென்ற நிலையில் அவர் சொன்ன மாதிரியே குழம்பு வைத்து விட்டார்கள் எனவும் இணையவாசிகள் மீம்ஸ் போட்டு வறுத்தெடுத்து வருகின்றனர்.