​​
Polimer News
Polimer News Tamil.
Advertisement
தன்னுடன் தொடர்பில் இருந்த ஆட்டோ ஓட்டுநரை கணவருடன் தீர்த்துக்கட்டிய பெண்

Published : Oct 21, 2019 2:45 PM

தன்னுடன் தொடர்பில் இருந்த ஆட்டோ ஓட்டுநரை கணவருடன் தீர்த்துக்கட்டிய பெண்

Oct 21, 2019 2:45 PM

சென்னை கொளத்தூரில் தன்னுடன் தவறான தொடர்பில் இருந்த ஆட்டோ ஓட்டுநரை கணவருடன் சேர்ந்து தலை வேறு, உடல் வேறாக வெட்டி வீசிய பெண் உட்பட 4 பேர் கைது செய்யப்பட்டுள்ளனர்.

கொளத்தூரை அடுத்த லட்சுமிபுரம் பகுதியில் தாய், மனைவி, குழந்தைகளுடன் வசித்து வந்தவர் ஆட்டோ ஓட்டுநரான சுரேஷ். கடந்த 14ஆம் தேதி வழக்கம்போல் சவாரிக்குச் சென்ற சுரேஷை அதன் பிறகு காணவில்லை என அவரது தாயார் கலா கொரட்டூர் போலீசில் புகாரளித்துள்ளார்.

வழக்குப்பதிவு செய்து போலீசார் சுரேஷை தேடி வந்த நிலையில், வடபெரும்பாக்கம் அருகே புதர் ஒன்றில் இருந்து தலையில்லாத ஆண் ஒருவரின் உடலை மீட்டு செங்குன்றம் போலீசார் விசாரித்து வருவது தெரியவந்தது. கொரட்டூர் போலீசாரின் விசாரணையில் அது காணாமல் போன சுரேஷின் உடல் என்பது தெரியவந்தது.

விசாரணையில் சுரேஷுக்கு பாடியை அடுத்த கலைவாணர் நகரில் சாலையோர இட்லி கடை நடத்தி வந்த கார்த்திகா என்ற பெண்ணுடன் தவறான தொடர்பு இருந்து வந்தது தெரியவந்தது.
காணாமல் போன அன்று கார்த்திகாவைத் தேடி அவரது வீட்டுக்குச் சென்ற சுரேஷுக்கும் அங்கு எதிர்பாராமல் வந்துவிட்ட கார்த்திகாவின் கணவர் ஜெயக்கொடிக்கும் தகராறு ஏற்பட்டதாகக் கூறப்படுகிறது. அந்த சூழலில் கணவருடன் சேர்ந்து கார்த்திகாவும் சுரேஷை தாக்கியதில் அவர் மயக்கமடைந்துள்ளார். இதனையடுத்து எதிர்வீட்டைச் சேர்ந்த ராஜா, சுந்தரகாண்டன் ஆகியோரது உதவியுடன் சுரேஷை ஒரு காரில் தூக்கிப்போட்டுக்கொண்டு செங்குன்றம் நோக்கிச் சென்றுள்ளனர்.

வடபெரும்பாக்கம் அருகே உள்ள புதர் ஒன்றில் வைத்து மயங்கிக்கிடந்த சுரேஷின் தலையை அறுத்து வீசியிருப்பதாக போலீசார் கூறுகின்றனர். இதனையடுத்து கார்த்திகா, அவரது கணவர் ஜெயக்கொடி, ராஜா, சுந்தரகாண்டன் ஆகியோரை கைது செய்தனர். சுரேஷின் உடலை கொலையான இடத்திலும் அவரது தலையை செங்குன்றம் அருகே உள்ள கால்வாயிலும் போலீசார் கண்டெடுத்தனர்.