​​
Polimer News
Polimer News Tamil.
Advertisement
சமூக வலைத்தளங்களில் முன்கூட்டியே வெளியான காலாண்டு தேர்வு வினாத்தாள்

Published : Sep 17, 2019 9:11 PM

சமூக வலைத்தளங்களில் முன்கூட்டியே வெளியான காலாண்டு தேர்வு வினாத்தாள்

Sep 17, 2019 9:11 PM

தமிழகத்தில் 11ம் வகுப்பு மாணவர்களுக்கான காலாண்டுத் தேர்வு வினாத்தாள் தேர்வுக்கு முன்கூட்டியே சமூக வலைத்தளங்களில் வெளியானது அதிர்ச்சியை ஏற்படுத்தியுள்ளது. தமிழகத்தில் 10,11 மற்றும் 12ம் வகுப்பு மாணவர்களுக்கான காலாண்டுத் தேர்வுகள் கடந்த 12ம் தேதி தொடங்கி நடைபெற்று வருகிறது.

பிளஸ் 2, எஸ்.எஸ்.எல்.சி. மாணவர்களுக்கு காலையிலும், பிளஸ் 1 மாணவர்களுக்கு பிற்பகலிலும் தேர்வுகள் நடைபெற்று வருகின்றன. இந்த நிலையில் கடந்த சில நாட்களாக தேர்வுக்கு முன்கூட்டியே வினாத்தாள்கள் ஷேர் சேட் எனப்படும் செல்போன் செயலியில் வெளியாகி வருவதாக புகார்கள் எழுந்தன.

இந்த நிலையில் பிளஸ் 1 கம்ப்யூட்டர் அப்ளிகேஷன் பாடப்பிரிவுக்கான தேர்வு வினாத்தாள், நேற்று காலையிலேயே ஷேர் சேட் ஆப்பில் கல்வி மற்றும் தொழில்நுட்பம் என்ற பக்கத்தில் வெளியாகி இருந்தது. செல்போன் செயலியில் வெளியாகி இருந்த வினாத்தாளும், பிற்பகலில் தேர்வு அறையில் மாணவர்களுக்கு வழங்கப்பட்டிருந்த வினாத்தாளும் ஒரே மாதிரியாகவே இருந்தன.

இதே போல் திங்கட்கிழமை நடைபெற்ற பிளஸ் 1 வணிகவியல் தேர்வுக்கான வினாத்தாளும் ஞாயிறுக்கிழமையே வெளியானதாக கூறப்படுகிறது. இந்த சம்பவம் ஆசிரியர்கள் மற்றும் கல்வியாளர்கள் மத்தியில் பெரும் அதிர்ச்சியை ஏற்படுத்தியுள்ளது.

எந்தெந்த தேர்வுகளுக்கு முன்கூட்டியே வினாத்தாள்கள் வெளியிடப்பட்டன? வினாத்தாளை சமூக வலைத்தளங்களில் வெளியிடுவோர் யார் என்பது குறித்து பள்ளிக்கல்வித்துறை உரிய விசாரணை நடத்தி நடவடிக்கை எடுக்க வேண்டும் என ஆசிரியர்கள் கோரிக்கை விடுத்துள்ளனர். பள்ளிகளுக்கு போதிய வினாத்தாள்கள் கிடைக்கப்பெறாததால் அவற்றை நகல் எடுக்க வேண்டிய தேவை ஏற்படுவதாக கூறப்படுகிறது.

இதனால் ஒரு சில பள்ளிகள் வெளி இடங்களில் நகல் எடுக்க வேண்டியுள்ளதால் வினாத்தாள்கள் அங்கிருந்து வெளியாவதாகவும், இதனை தடுக்க அந்தந்த பள்ளிகளுக்கு போதிய வினாத்தாள்களை அரசு விநியோகித்தால் மட்டுமே முறைகேடுகளை தடுக்க முடியும் என ஆசிரியர்கள் கருத்து தெரிவிக்கின்றனர்.