வக்பு வாரியத்தின் தன்னாட்சியை அழித்து சிறுபான்மை இஸ்லாமிய மக்களுக்கு அச்சுறுத்தலை ஏற்படுத்தும் மத்திய அரசின் சட்டத்திற்கு எதிராக தமிழ்நாடு போராடும் என்று முதலமைச்சர் மு.க.ஸ்டாலின் அறிவித்துள்ளார்.

சட்டப்பேரவையில் பேசிய முதலமைச்சர், பெரும்பான்மை கட்சிகளின் எதிர்ப்பையும் மீறி வக்பு சட்டத்தை மக்களவையில் நிறைவேற்றி இருப்பது, மதநல்லிணக்கத்தை சீர்குலைக்கும் செயல் என்று கண்டனம் தெரிவித்தார். வக்பு மசோதாவை திரும்ப பெற வலியுறுத்தி சட்டப்பேரவையில் மு.க.ஸ்டாலின் தலைமையில் எம்எல்ஏக்கள் முழக்கமிட்டனர்.

வக்பு சட்ட திருத்த மசோதாவிற்கு எதிரான தமிழக அரசின் நிலைப்பாட்டிற்கு அதிமுக ஆதரவளிப்பதாகவும், இந்த விவகாரத்தில் தமிழக அரசின் நடவடிக்கைகளுக்கு அதிமுக துணை நிற்கும் என்றும் கொறடா எஸ்பி வேலுமணி தெரிவித்தார்.

இதனிடையே வக்பு மசோதாவை திரும்ப பெற வலியுறுத்தி சட்டப்பேரவையில் முதலமைச்சர் மு.க.ஸ்டாலின் தலைமையில் எம்எல்ஏக்கள் முழக்கமிட்டதற்கு எதிராக பாஜக எம்எல்ஏக்கள் பேரவையில் இருந்து வெளிநடப்பு செய்தனர்.