திருப்பூர் மாவட்டம் பல்லடம் அருகே வேறு சமூகத்தை சேர்ந்த இளைஞரை காதலித்ததால் அண்ணனே இரும்பு ராடால் தங்கையின் தலையில் அடித்து கொடூரமாக கொலை செய்துள்ளதாக தகவல் வெளியாகியுள்ளது.

கோவை அரசு கல்லூரியில் முதுகலை பயின்று வந்த பருவாய் கிராமத்தை சேர்ந்த வித்யாவை, அதே கல்லூரியில் படித்து வந்த வெண்மணி என்ற மாற்று சமூக இளைஞர் காதலித்து வந்ததாகவும், பெண் கேட்டு சென்றபோது பெற்றோர் திருமணம் செய்து தரமறுத்ததாகவும் கூறப்படுகிறது.

இந்தநிலையில் கடந்த ஞாயிற்றுக்கிழமை பீரோ விழுந்ததால் தலையில் படுகாயமடைந்து வித்யா மரணமடைந்ததாக கூறப்பட்டது.

ஆனால் மரணத்தில் சந்தேகம் இருப்பதாக காதலன் அளித்த புகாரின்பேரில் விசாரணை நடத்திய காமநாயக்கன்பாளையம் போலீசார் மருத்துவ குழுவினர் உதவியுடன் வித்யாவின் உடலை தோண்டி எடுத்து உடற்கூறு ஆய்வு மேற்கொண்டனர்.

அதில் வித்யாவை தாக்கியதற்கான அறிகுறி தென்பட்டதால், நடைபெற்ற விசாரணையில் மாற்று சமூக இளைஞரை காதலித்ததால் தங்கையை இரும்பு ராடால் தலையில் அடித்து கொன்றதாக சகோதரன் சரவணன் வாக்குமூலம் அளித்துள்ளதாக போலீசார் கூறியுள்ளனர்.

வித்யாவின் தாய் மற்றும் தந்தையிடமும் விசாரணை நடத்தப்படுகிறது.