தென்காசி ஊராட்சி குழு கூட்டத்தில் திமுக கவுன்சிலர்கள் ஒருவருக்கொருவர் கடுமையான வாக்குவாதத்தில் ஈடுபட்டனர். நிதி ஒதுக்குவதில் ஊழல் நடை பெற்றதாக குற்றஞ்சாட்டியதால் பரபரப்பு ஏற்பட்டது

தென்காசி மாவட்ட ஆட்சியர் அலுவலக வளாகத்தில் மாவட்ட ஊராட்சிக்குழு கூட்டம் தலைவி தமிழ்செல்வி தலைமையில் நடந்தது.

மாவட்ட கவுன்சிலர்களுக்கு நிதி ஒதுக்குவதில் பாரபட்சம் காட்டுவதாகவும் நிதிகளை மக்கள் திட்டங்களுக்கு தேவையான முறையில் அனைத்து கவுன்சிலர்களுக்கும் சமமாக பிரித்து வழங்க வேண்டும் என முறையிட்ட திமுக கவுன்சிலர் கனிமொழி அதிகாரிகள் அஜெண்டா தயார் செய்யும் போது முறையாக கவுன்சிலர்களுக்கு கொடுப்பதில்லை, பாரபட்சமாக நிதி ஒதுக்குவதில் ஊழல் நடைபெறுகிறது என குற்றம் காட்டினார்

சக திமுக கவுன்சிலரான பூங்கொடி ஊழல் என குறிப்பிடாதீர்கள் நிதியில் முறைகேடு என குறிப்பிடுங்கள் திமுக ஆட்சியில் ஊழலுக்கு இடமில்லை என வாக்குவாதத்தில் ஈடுபட்டார்

இந்த சம்பவம் கடுமையான வாக்குவாதமாக ஏற்பட்ட நிலையில் கவுன்சிலர்கள் ஒருவருக்கொருவர் ஒருமையில் பேசிக் கொண்டனர். திமுக ஆட்சியில் ஊழல் என்று கூறாதீர்கள் நிதிமுறைகேடு எனக் கூறுங்கள் என ஊழலுக்கு வேறு பெயர் சூட்டி தொடர்ந்து வாக்குவாதத்தில் ஈடுபட்டார்

இதற்க்கிடையே கவுன்சிலரின் கணவர் கூட்டத்திற்குள் நுழைந்து கூட்டத்தை முடிக்குமாறு சத்தம் போட்டது பரபரப்பை ஏற்படுத்தியது.

திமுக மாவட்ட கவுன்சிலரான மதி மாரியப்பன் ஊழல் நடக்காமல் என்ன நடக்கிறது என்று கேட்டதால் , மறுபடியும் ஊழல் என்று சொல்லாதீர்கள் நிதி பாரபட்சம் என்று சொல்லுங்கள் என கவுன்சிலர் பூங்கொடி சொன்னதால் மீண்டும் பரபரப்பு ஏற்பட்டது

திமுக மாவட்ட கவுன்சிலர்கள் நிரம்பிய மாவட்ட ஊராட்சி கூட்டத்தில் திமுகவின் மாவட்ட ஊராட்சி தலைவர் மற்றும் மாவட்ட ஊராட்சியின் குறித்து ஊழல் குறித்து கவுன்சிலர்கள் கடுமையாக விவாதித்துக் கொண்டது பரபரப்பை ஏற்படுத்தியது