இன்று சர்வதேச மகளிர் தினம் கொண்டாடப்படுகிறது....பெண்களின் சிறப்பை கூறும் ஒரு செய்தித் தொகுப்பைக் காண்போம்.....

தாயில்லாமல் நானில்லை என்பது ஒரு பாடல் மட்டுமல்ல உண்மையும் தான். அதனால்தான் தாய்வழிச் சமூகமாக நாம் வளர்ந்திருக்கிறோம். தாய்நாடு, தாய்மொழி, தாயன்பு என்று பல உதாரணங்களைக் காணலாம். ஒரு மனிதன் ஆணோ பெண்ணோ முதல் அன்பும் அணைப்பும் தாயிடமிருந்துதான் கிடைக்கிறது.

தாய், சகோதரி, தோழி, மனைவி, மகள் என்று பல வகைகளில் ஆண்களுடன் பெண்கள் உருவாக்கிய உலகத்தில் தான் இன்று நாம் வாழ்ந்துக் கொண்டிருக்கிறோம்.

பெண் சிசுவைக் கருவிலேயேக் கொல்லும் கண்மூடிப் பழக்கம் மண்மூடிப் போனது. பெண்கள் கல்வி அரசுப்பதவிகள், தலைமைப் பொறுப்புகளைத் தாங்கிக் கொண்டிருக்கும் காலத்தில் நாம் வாழ்ந்துக் கொண்டிருக்கிறோம்.

பெண்களுக்கு எதிராக சமூகத்தில் நடைபெறும் வன்முறைகள், பாலியல் குற்றங்கள், பாதுகாப்பு அச்சுறுத்தல்கள் சமூக ஊடகங்களில் பரவியுள்ள ஆபாசம் போன்றவை பல ஆயிரக்கணக்கான பெண்களின் வாழ்க்கையை இருளுக்குள் தள்ளிவிடுகின்றன.

சட்டம் தனது கடமையைச் செய்கின்ற போதும் பெண்களின் பாதுகாப்பை கண்போல் காக்கும் பொறுப்பு ஒவ்வொருவருக்கும் நம் எல்லோருக்கும் உள்ளது

இன்று சொந்தக் காலில் நிற்கும் பெண்கள், குடும்பத்தின் சுமைகளைப் பகிர்ந்துக் கொள்கின்றனர். சமையல் அறைகளில் இருந்து உலகின் மிகப்பெரிய சபைகளில் இன்று பெண்கள் ஆளுகிறார்கள். பெண்களை மேன்மைப்படுத்தும் சமூகம்தான் எப்போதும் மகிழ்ச்சிகரமான எதிர்காலத்தையே உருவாக்கும் என்பது சான்றோர் வாக்கு.