சென்னை ஆல்பட் திரையரங்கில் உள்ள கேண்டீனில் காலாவதியான குளிர்பானம் விற்கப்படுவதை தட்டிக்கேட்டு பெண் வெளியிட்ட வீடியோவால், விழித்துக் கொண்ட உணவு பாதுகாப்பு அதிகாரிகள் ஆய்வு மேற்கொண்டு, திரையரங்க கேண்டினின் உரிமத்தை ரத்து செய்தனர்

சென்னை எழும்பூரில் உள்ள ஆல்பர்ட் திரையரங்கத்திற்கு ஞாயிற்றுக்கிழமை நேற்று மாலை பெண் ஒருவர் தனது குழந்தைகளுடன் படம் பார்க்க சென்றிருந்தார் . திரைப்படம் இடைவேளையின் போது அங்குள்ள கேண்டினில் Bit drink என்ற குளிர்பானம் வாங்கியுள்ளார்

அந்த குளிர்பானத்தை, திரையரங்க இருட்டில் அப்பெண்ணும் குழந்தைகளும் குடித்துள்ளனர் அப்போது அதிலிருந்து அழுகிப்போன, கெட்ட சாராய வாடை அடித்ததால் வெளிச்சத்திற்கு எடுத்து வந்து பார்த்ததும் அதிர்ச்சி அடைந்தார்.

குளிர்பானத்தில் உள்ள மேல் மூடி மற்றும் பாட்டில் முழுவதும் அழுக்கு கரை படிந்து இருந்ததாக கேண்டின் பணியாளர்களிடம் வாக்குவாதத்தில் ஈடுபட்டார். இதை நீங்க குடிப்பீங்களா ? என்று அவர் கேள்வி எழுப்பினார்

தொடர்ந்து அதனை பருகி பார்த்த ஊழியர் அதனை வெளியில் துப்பியதால், இதனை எங்களுக்கு ஏன் விற்பனை செய்தீர்கள் ? என்று கேட்டு அந்த பெண் ஆவேசமானார்

அந்த பெண் அளித்த புகாரின் அடிப்படையில் சென்னை மாவட்ட உணவு பாதுகாப்பு துறை நியமன அலுவலர் சதீஷ்குமார் தலைமையில் உணவு பாதுகாப்பு துறை அதிகாரிகள், ஆல்பர்ட் திரையரங்க கேண்டினில் சோதனை மேற்கொண்டனர்

அப்போது காலாவதியான குளிர்பானங்கள், சிப்ஸ் பாக்கெட்டுகள், பாப்கான் டப்பாக்கள் உள்ளிட்டவை கொத்துக்கொத்தாக பறிமுதல் செய்யப்பட்டது

மேலும், பாப்கான் டப்பாக்கள் கடந்த ஆண்டு நவம்பர் மாதமே காலாவதியான தேதி முடிவடைந்து, தற்போதும் ஸ்டோரூமில் வைக்கப்பட்டிருந்ததைக் கண்டு உணவு பாதுகாப்புத்துறை அதிகாரிகள் அதிர்ச்சி அடைந்தனர். உடனடியாக அவை அனைத்தையும் தரையில் கொட்டினர்

சோதனைக்குப் பிறகு செய்தியாளர்களை சந்தித்த சென்னை உணவு பாதுகாப்புத்துறை நியமன அலுவலர் சதீஷ்குமார்
இந்த குளிர்பானம் கேரளாவிலிருந்து வந்துள்ளது என்றும் அவர்களிடம் விளக்கம் கேட்டு நோட்டீஸ் அனுப்பப்படும் எனவும் தெரிவித்த சதீஷ்குமார், தற்போது ஆல்பர்ட் கேண்டின்உரிமம் ரத்து செய்யப்பட்டுள்ளதாகவும் கேண்டின் இழுத்து மூடப்படும் என்றும் தெரிவித்தார். மேலும் கேண்டின் உரிமம் யார் பெயரில் உள்ளதோ அவர் மீது நடவடிக்கை மேற்கொள்ளப்படும் என்றார்

தொடர்த்து சென்னை முழுவதும் உள்ள எல்லா திரையரங்குகளிலும் சோதனை மேற்கொள்ள உள்ளனர். பழைய காலாவதியான பொருட்கள் வேறு ஏதாவது வைத்து உள்ளார்களா என்பது குறித்தும் ஆய்வுகளை மேற்கொள்ள உள்ளோம் என தெரிவித்தார்