விக்கிரவாண்டி தனியார் பள்ளி சிறுமி லியா மரணத்தில் வெளியாகியுள்ள புதிய சிசிடிவி காட்சிகளை சுட்டிக்காட்டி பள்ளி நிர்வாகத்தின் மீது பல்வேறு குற்றச்சாட்டுகளை பாதிக்கப்பட்ட தரப்பு சுமத்தியுள்ளது.

விக்கிரவாண்டி தனியார் பள்ளியில் செப்டிக் டேங் குழியில் விழுந்து உயிரிழந்ததாக கூறப்படும் சிறுமி லியாவை பள்ளி பெண் ஊழியர் ஒருவர் கையில் தூக்கிச்சென்றதாக கூறப்படும் சிசிடிவி காட்சி தான் இது... சிறுமியின் மரணத்தில் எழும் கேள்விகள் என்ன?

விக்கிரவாண்டியில் உள்ள செயின்ட் மேரீஸ் பள்ளி வளாகத்தில் விளையாடிக்கொண்டிருந்த மூன்றரை வயதே ஆன யு.கே.ஜி மாணவி லியா லட்சுமி, உணவு இடைவேளைக்கு பின்னர், தனியாக கழிவறை சென்றதாக கூறப்படுகிறது. அப்போது, கழிவுநீர் தொட்டியில் தவறி விழுந்து பலியானதாகவும் பள்ளி நிர்வாகம் தரப்பில் கூறப்பட்டது.

இதை ஏற்க மறுத்த சிறுமி லியாவின் பெற்றோர், தங்களது மகளின் மரணத்தில் பள்ளி நிர்வாகம் நாடகமாடுவதாக குற்றம்சாட்டினர்.

முதலில் வெளியான சிசிடிவி காட்சிகள் வெட்டி ஒட்டப்பட்டதாக லியாவின் பெற்றோர் குற்றம்சாட்டிய நிலையில், சம்பவத்தின் போது பள்ளி சிசிடிவியில் பதிவான வேறு சில காட்சிகள் வெளியாகியுள்ளது.

சிசிடிவி காட்சிகளில் ஒரு இடத்தில் இறந்த நிலையில் குழந்தையின் உடலை தூக்கிகொண்டு பெண் ஊழியர் ஒருவர் அங்கும் இங்கும் அலைவந்து போன்ற காட்சிகள் இடம்பெற்றுள்ளதாக பாதிக்கப்பட்டவர்கள் தரப்பு வழக்கறிஞர் குற்றம்சாட்டியுள்ளார்

லியாவின் மரணத்திற்கான உண்மையான காரணத்தை மறைத்துவிட்டு, செப்டிக் டேங்கில் இருந்து உடல் எடுக்கப்பட்டதாக பள்ளி நிர்வாகம் நாடகமாடுவதை வெளியாகியுள்ள சிசிடிவி காட்சிகள் வெளிச்சம்போட்டு காட்டிள்ளதாகவும் அவர் குற்றம்சாட்டினார்.

செப்டிக் டேங்கில் விழுந்து சிறுமி பலியானதாக கூறப்பட்ட நிலையில், பிரேத பரிசோதனை முடித்து குடும்பத்தாரிடம் ஒப்படைக்கப்பட்ட லியாவின் உடையிலும், ரிப்பனிலும் ரத்தக்கறை இருந்தது எப்படி? எனவும் வழக்கறிஞர் கேள்வி எழுப்பியுள்ளார்.

சிறுமி லியா மரணம் குறித்து சிபிசிஐடி விசாரணை அல்லது ஓய்வு பெற்ற நீதிபதி தலைமையில் விசாரணை நடத்தப்படவேண்டும் என நீதிமன்றத்தை நாடவுள்ளதாக உயிரிழந்த சிறுமியின் குடும்பத்தினர் தெரிவித்துள்ளனர்.