கொடநாடு கொலை, கொள்ளை வழக்கில் எடப்பாடி பழனிசாமி, சசிகலா உள்ளிட்டோரை விசாரிக்க கோரிய வழக்கு.... காவல்துறை பதிலளிக்க உத்தரவு

0 1872

கொடநாடு கொலை, கொள்ளை வழக்கு தொடர்பாக முன்னாள் முதலமைச்சர் எடப்பாடி பழனிசாமி, சசிகலா உள்ளிட்டோரை விசாரிக்க கோரும் மனுவுக்கு மூன்று வாரங்களில் பதிலளிக்க, காவல்துறைக்குச் சென்னை உயர் நீதிமன்றம் உத்தரவிட்டுள்ளது.

கொடநாடு வழக்கில் 8 பேருக்கு எதிராக வழக்குப் பதிந்து நீலகிரி நீதிமன்றத்தில் குற்றப்பத்திரிகை தாக்கல் செய்து விசாரணை நடைபெற்று வருகிறது.

இந்த வழக்கில் முன்னாள் முதலமைச்சர் எடப்பாடி பழனிசாமி, சசிகலா, இளவரசி, சுதாகரன், நீலகிரி மாவட்ட முன்னாள் ஆட்சியர் சங்கர், முன்னாள் எஸ்.பி முரளி ரம்பா, அதிமுக நிர்வாகி சஜீவன், கொடநாடு எஸ்டேட் மேலாளர் நடராஜன், சுனில் ஆகியோரை விசாரிக்க கோரி, வழக்கில் குற்றம் சாட்டப்பட்ட தீபு, சதீசன், சந்தோஷ் சாமி ஆகியோர் மனு தாக்கல் செய்தனர். எஸ்டேட் மேலாளர் நடராஜனை மட்டும் விசாரிக்க அனுமதித்த நீதிமன்றம், மற்றவர்களை விசாரிக்க அனுமதி மறுத்துவிட்டது.

இந்நிலையில் நீலகிரி நீதிமன்ற உத்தரவை எதிர்த்துச் சென்னை உயர்நீதிமன்றத்தில் தாக்கல் செய்த மனுவில், கொடநாடு எஸ்டேட்டில் கொள்ளை போன பொருட்கள் எவை என்பது பற்றி சசிகலா, இளவரசி ஆகியோருக்குத் தான் தெரியும் எனக் குறிப்பிட்டுள்ளனர். இந்த வழக்கில் முன்னாள் முதலமைச்சர் எடப்பாடி பழனிசாமியின் தொடர்பு குறித்து சயான் பேசியுள்ளதன் தீவிரத்தைப் பரிசீலிக்க நீலகிரி நீதிமன்றம் தவறிவிட்டதாகவும் குறிப்பிட்டுள்ளனர்.

புலன் விசாரணைக் குழு, வெளிப்படையான விசாரணையை மேற்கொள்ளவில்லை என்றும், முக்கியக் குற்றவாளிகளை விட்டுவிட்டதாகவும் குறிப்பிட்டுள்ளனர். இந்த மனு நீதிபதி நிர்மல்குமார் முன் இன்று விசாரணைக்கு வந்தபோது, கூடுதலாகச் சிலரை விசாரிக்க வேண்டும் என்பதற்கான காரணங்களை மனுதாரர்கள் விளக்கமாகக் கூறவில்லை என்றும், இதுதொடர்பாக மனுதாரர்கள் தெரிவிக்க வேண்டும் என்றும் தெரிவித்தார். இந்த மனுவுக்கு மூன்று வாரங்களில் பதிலளிக்கக் காவல்துறைக்கும் உத்தரவிட்டார்.

SHARE
RELATED POSTS
Click to comment
LEAVE COMMENT
SUBMIT

Comments