தமிழகத்தில் இன்று 8,449 பேருக்கு கொரோனா உறுதி.. 33 பேர் உயிரிழப்பு..!

0 2941

தமிழ்நாட்டில் ஒருநாள் கொரோனா பாதிப்பு 8 ஆயிரத்தை கடந்துள்ளது. சென்னை, கோயம்புத்தூர், செங்கல்பட்டு உள்ளிட்ட மாவட்டங்களில் பாதிப்பு தொடர்ந்து அதிகரித்து வருகிறது. 

தமிழ்நாட்டின் கொரோனா பாதிப்பு நிலவரம் குறித்து, மாநில சுகாதாரத்துறை அறிக்கை வெளியிட்டிருக்கிறது. இதன்படி, தமிழ்நாட்டில், கடந்த 24 மணி நேரத்தில், புதிதாக 8,449 பேருக்கு கொரோனா பாதிப்பு உறுதியாகியுள்ளதாக தெரிவிக்கப்பட்டுள்ளது.

பெருந்தொற்று பாதிப்பிலிருந்து, 4,920 பேர் குணமடைந்து வீடு திரும்பியுள்ளனர். கொரோனாவால் பாதிக்கப்பட்டு சிகிச்சை பெற்று வந்தவர்களில், இணைநோய் இல்லாத 4 பேர் உட்பட 33 பேர் உயிரிழந்துள்ளனர். அண்மை நாட்களில் இதுவே அதிகமான உயிரிழப்பாகும்.

மேற்குவங்கத்திலிருந்து வந்த 13 பேர், கர்நாடகாவிலிருந்து வந்த 9 பேர் உட்பட வெளிமாநிலங்களிலிருந்து வந்த 29 பேருக்கு தொற்று உறுதியாகியுள்ளது. சென்னை பெருநகரில், மேலும் 2,636 பேருக்கு கொரோனா பாதிப்பு உறுதி செய்யப்பட்டுள்ளது.

செங்கல்பட்டு மாவட்டத்தில் 795 பேருக்கும், கோயம்புத்தூரில் 583 பேருக்கும் புதிதாக கொரோனா உறுதியாகியுள்ளது. 21 மாவட்டங்களில் மூன்று இலக்கத்தில் கொரோனா பாதிப்பு பதிவாகியுள்ளது.

ஒரே நாளில், 12 வயதுக்குட்பட்ட 310 சிறுவர்கள் புதிதாக கொரோனா தொற்று பாதிப்பு ஆளாகியுள்ளனர். சுகாதாரத்துறை அறிக்கையின்படி, 61,593 பேர், கொரோனாவுக்கு சிகிச்சை பெற்று வருவதாகத் தெரிவிக்கப்பட்டுள்ளது. 

SHARE
RELATED POSTS
Click to comment
LEAVE COMMENT
SUBMIT

Comments