புலி இழந்தால்.... புவி இழப்போம்

0 5651

இந்தியாவின் தேசிய விலங்கான புலிகள் பற்றிய கணக்கெடுப்பு உலக சாதனை புத்தகத்தில் இடம் பெற்றுள்ளதாக மத்திய அரசு மகிழ்ச்சி தெரிவித்துள்ளது. புலிகள் கணக்கெடுப்பு எவ்வாறு நடத்தப்படுகிறது, இந்தச் சாதனை எப்படி நிகழ்த்தப்பட்டது என்பது குறித்து விவரிக்கிறது இந்தச் செய்தித் தொகுப்பு. 

அழகும், அறிவும், ஆக்ரோஷமும், கம்பீரமும் சேர்ந்த விலங்கான புலி, இந்தியாவின் தேசிய விலங்காக உள்ளது. உணவுச் சங்கிலியின் உச்சத்தில் உள்ள புலிகள், உலகம் முழுவதும் உள்ள வேட்டையாடிகளால் வரைமுறையின்றி வேட்டையாடப்பட்டதால் தற்போது அங்கொன்றும் இங்கொன்றுமாக உலாவி வருகின்றன.

முற்றிலுமாக அழிந்துவிட்ட புலி இனங்களான பாலி புலி, ஜாவா புலி, கேஸ்பியன் புலி ஆகியவற்றைப் போலவே தற்போது வாழ்ந்துவரும் புலி இனங்களும் அருகி வரும் இனங்களாக உள்ளன. உலகில் உள்ள மொத்த எண்ணிக்கையில் 70 விழுக்காடு புலிகளை கொண்டது இந்தியா.

ஆனால் மற்ற இடங்களை விட இந்தியாவில் புலிகள் வேட்டை சில ஆண்டுகளுக்கு முன் அதிகரித்திருந்த நிலையில் தற்போது அவை பெருமளவு கட்டுப்படுத்தப்பட்டுள்ளன. இந்த நிலையில்தான் கடந்த 2018ம் ஆண்டு எடுக்கப்பட்ட புலிகள் கணக்கெடுப்பு முறை உலக சாதனை படைத்துள்ளது.

பொதுவாக வனவிலங்குகள் கணக்கெடுப்பு என்பது நேரடி கணக்கெடுப்பு மற்றும் மறைமுகக் கணக்கெடுப்பு என வனத்துறையினர் பிரித்து வைத்துள்ளனர். தமிழகக் காடுகள் பெரும்பாலும் அடர்த்தியாக இருப்பதால் இங்கு நேரடியாக புலிகளைப் பார்ப்பது அரிதினும் அரிதாக உள்ளது.

அதற்கு பெரிதும் உதவுவது மறைமுகக் கணக்கெடுப்பே. முதலாவதாக புலிகளின் கால்தடத்தைக் கண்டறிந்து அதில் பிளாஸ்டர் ஆஃப் பாரிஸ் கரைசலை ஊற்றி வார்த்தெடுத்து அதன் மூலம் புலி குறித்த தகவல்களைப் பெறமுடியும்

இதனைப் போலவே புலியின் எச்சத்தை கண்டறிந்து, பின்னர் அதனை டிஎன்ஏ சோதனைக்கு உட்படுத்துவதன் மூலமும் புலிகள் பற்றிய கணக்கெடுப்பு நடத்தப்படுகிறது.  இது தவிர தங்கள் நகங்களை கூர்மையாக்கவும், அதில் சிக்கியுள்ள இறைச்சித் துணுக்குகளை அகற்றவும் குறிப்பிட்ட சில மரங்களில் புலிகள் பிறாண்டுவதை வழக்கமாகக் கொண்டிருக்கும். அதுபோன்ற பிறாண்டல் அந்த மரத்தில் ஆழமாகப் பதிந்திருக்கும். இதன் மூலமும் வனத்துறையினர் புலிகளைக் கணக்கெடுப்பது வழக்கம்.

இதனைப் போலவே தங்கள் எல்லையைக் குறிப்பதற்கும், பெண் புலிகளை ஈர்ப்பதற்காகவும் ஆண் புலிகள் ஆங்காங்கே சிறுநீரை கழித்து விட்டுச் செல்லும்.  இவை அனைத்தையும் விட துல்லியமாகவும், வேகமாகவும் கணக்கிடுவதற்கு கேமரா ட்ராப்பிங் முறை கையாளப்படுகிறது.

அதாவது மேற்கூறிய அத்தனை தரவுகளும் வந்த பின்னர் புலிகள் நடமாடும் இடங்களில் இரவிலும் படம் பிடிக்கும் வசதி கொண்ட நவீன கேமராக்களை பொருத்தி அதன் மூலம் புலிகளின் எண்ணிக்கை, பாலினம், வயது உள்ளிட்ட விபரங்களைப் பெறமுடியும். ஒரு முறை கணக்கெடுப்பு நடத்தப்பட்டால் அதன் துல்லிய முடிவுகள் வெளிவர 6 மாதங்கள் முதல் ஒரு வருடம் வரை ஆகலாம் என்கின்றனர் வனத்துறையினர்.

இத்தனை அரும்பாடுகளுக்கு நடுவேதான் இந்தச் சாதனை நிகழ்த்தப்பட்டுள்ளது. இதனால்தான் கடந்த 2010ம் ஆண்டு ஆயிரத்து 706 ஆக இருந்த புலிகள் எண்ணிக்கை 2018ல் 2967 ஆக உயர்ந்துள்ளது.

இதைத்தான் இந்தியாவில் புலிகளை எண்ணுவதற்கு கடைபிடிக்கப்பட்ட நடைமுறை வெற்றியடைந்துள்ளதாகவும், கேமரா மூலம் மேற்கொள்ளப்பட்ட மிகப்பெரிய வனவிலங்கு குறித்த கணக்கெடுப்பு என கின்னஸ் உலக சாதனை அமைப்பு அங்கீகரித்துள்ளதாகவும் பெருமிதத்துடன் தெரிவித்துள்ளார் மத்திய அமைச்சர் பிரகாஷ் ஜவடேர்.

SHARE
RELATED POSTS
Click to comment
LEAVE COMMENT
SUBMIT

Comments