​​
Polimer News
Polimer News Tamil.
Advertisement
நியூசிலாந்து தாக்குதல் தீவிரவாதி விசாரணையின் போது சிரித்துக் கொண்டே இருந்ததாக தகவல்

Published : Mar 16, 2019 11:23 AM

நியூசிலாந்து தாக்குதல் தீவிரவாதி விசாரணையின் போது சிரித்துக் கொண்டே இருந்ததாக தகவல்

Mar 16, 2019 11:23 AM

நியுசிலாந்தில் மசூதிகளுக்குள் புகுந்து 49 பேரை சுட்டுக் கொன்ற தீவிரவாதி மீது கொலைக் குற்றச்சாட்டு பதிவு செய்யப்பட்டுள்ளது. நீதிமன்ற விசாரணையின் போது அவன் சிரித்துக் கொண்டே இருந்ததாக தகவல் வெளியாகியுள்ளது. 

நியுசிலாந்து நாட்டின் கிறிஸ்ட்சர்ச் நகரில் உள்ள இரு மசூதிகளில் நேற்று தீவிரவாதிகள் நடத்திய  கொடூரத் தாக்குதலில் 49 பேர் பரிதாபமாக உயிரிழந்தனர்.

இது தொடர்பாக ஆஸ்திரேலிய நாட்டைச் சேர்ந்த பிரெண்டன் ஹாரிசன் டர்ரண்ட் ((Brenton harrisaon tarrant)) என்ற தீவிரவாதி உள்ளிட்ட 3 பேரை போலீசார் கைது செய்துள்ளனர்.

இதனை தொடர்ந்து ஹாரிசன் கிறிஸ்ட்சர்ச் நகரில் உள்ள மாவட்ட நீதிமன்றத்தில் ஆஜர்படுத்தப்பட்டான். அப்போது, தனது பெயர் மற்றும் விவரங்களை வெளியிடத் தடை கோரும் மனுவோ, அல்லது ஜாமின் மனுவோ அவன் சார்பில் தாக்கல் செய்யப்படவில்லை. மேலும் விசாரணை நடைபெற்றுக் கொண்டிருந்த போது செய்தியாளர்களை பார்த்து டர்ரண்ட் சிரித்துக் கொண்டே இருந்ததாக தகவல்கள் தெரிவிக்கின்றன. அவனை ஏப்ரல் ஐந்தாம் தேதி வரை காவலில் வைக்க நீதிபதி உத்தரவிட்டார்.

இதனிடையே இச்சம்பவம் குறித்து பேசியுள்ள நியுசிலாந்து பிரதமர் ஜெசிந்தா ஆர்டெர்ன், தங்கள் நாட்டில் துப்பாக்கி வைத்துக் கொள்ள அனுமதிப்பது தொடர்பாக சட்டத்தை திருத்த உள்ளதாகக் கூறியுள்ளார்.

மசூதிகளில் தாக்குதல் நடத்தியவன் 5 துப்பாக்கிகள் மூலம் சுட்டதாகக் கூறியுள்ள அவர், இதற்கான உரிமங்களும் அவனிடம் உள்ளதாகத் தெரிவித்துள்ளார். 

மற்றொரு மசூதியில் நடத்தப்பட்ட தாக்குதலின் போது தீவிரவாதியை, ஒரு நபர் பின்புறமாக வந்து பிடித்துக் கொண்டதால் உயிர் தப்பியதாக பலர் கண்ணீர் மல்க கூறியுள்ளனர். அந்த நபர் யார் என்று தெரியவில்லை என்றும், ஆனால் அவர் மட்டும் அவ்வாறு செய்யவில்லை என்றால், தாங்கள் உயிர் பிழைத்திருக்க வாய்ப்பில்லை என்றும் இந்தியரான பைசல் சயீத் ((Faisal Sayed)) கூறியுள்ளார்.